قصيده ( الشطاره ) للشاعر (( احمد هلال ))

الشطارة

بقلمي أحمد هلال

ــــــــــ

الشطاره
لما تكتب حرف يبقى جديد عليك
ولا ترسم صورة مشفتهاش عينيك
ولا لما تلاقى روحك دايما تنصفك
وأما ع الحق تثور ولا أى شئ يخوفك
وأما من قلبك كمان .. تبنى للحب مناره
تبقى هى دى أيوه الشطاره
والشطاره
لما تفتح للأمل باب صغير وسط حاره
وأما بيتك يوم هيكبر يتلموا فيه كل الحبايب
وجوة منه تلقى أحضان الدفا
واللى يسأل عل غايب
واللى نام جواه أمان حتى لو.. غطاه شيكاره
والشطاره
لما تعَود خطوتك على مسجدك
تحمد وتشكر ربنا على نعمته لمحبتك
وأما تذكر ربنا وقت الرخا
هتلاق ربك ينصفك فى بلوتك
واما تمد أيدك بالخير تملي ف دنيتك
الناس هتجيب فى سيرتك
وتشوف كل كلامك فيه البشاره
والشطاره
لما تكون عرقان شقيِ على لقمتك
وتوب الستر والعفه على جتتك
شغلك باخلاص وبجهد وبهمتك
جد بكلامك جوة منك قلب يرحم
مش يكون كل الكلام شخط وأمارة
والشطاره
لو بجد تحب وطنك
وأما تزرع خير فى بلدك
وأما تمسح يوم دموعها لما تحزن
وأما تحمى بجد عرضك
لما ترفع يوم علمها تكيد عدوك
أما لو صابها العدو وأداك فى ضهرك
مش هتبقى يوم شطاره
يبقى يا مليون خساره
يبقى يا مليون خساره
ــــــــــــــــــــــــــــ
بقلمي أحمد هلال