قصيده ( زفة شهيد ) للشاعر (( احمد هلال ))

زفة شهيد

بقلمي .. أحمد هلال

ــــــــــــــــــــــ

مجتش ليه يا ولدي
إيه أخَرك عن زفتك
الكل عاد بدري
طب ليه مأخر فرحتك
وأمك المسكينه م الفجريه صحيت لك
طبخت بديها الأكل
سوتلك كمان .. فرشتك
حتى عروستك مستنياك
رسمه بإيديها حِنتك
إرجع ياولدي لحضن أبوك
بلاش تفارق دنيتك
أنا لسه واقف ع الطريق
مستنى أسمع خطوتك
ومن تاني ترجع ياولدي
تشق قلب الليل
تمحي الظلام من سِكتك
حتى صحابك اللى كانوا ع الحدود
وياك ياولدي جايين كتير
جايين ياولدى لدخلتك ؟
بس ليه الحزن باين ع الوشوش
والدمعه ليه متحجرة فوق الخدود
طب هُما ليه جايين ياولدي لوحدهم ؟
فينك يا ولدى وسطهم ؟
حاسس برعشة جوا قلبي وخوف كتير
حاسس هضم أنا جثتك
مين اللى قتلك يا ياوليدي
صابك يهودي ياشهيد
ولا اللى قتلك يبقى أخوك
لا مش أخوك ..!!
لوكان أخوك مكنش غير مِلته
باع كل حاجه ... حتى كمان باع أخرته
مين اللى خانك يا وطن
وهان عليه يوم دمعتك
طب قوم ياولدى وإبتسم
وأرسم على باب الفرح
نخل وطرح .. فى جنتك
تِعرف ياولدي ؟
أمك لِساتها واقفه ع الطريق
ماسكه بإيدها بدلتك
تستنى تعلن فرحتك
طب كيف أقول لها
إن ملايكه من السما
جاتلك هنا
علشان تنور دفنتك
ياسندي كنت ف الدنيا
وعكازي على الآيام
فارقتني كدا فى ثانيـــــه
راحت معاك أحلام
بدلت توب العُرس
ولبسته بلا أكمام
إرتاح يا ولدي فى جنتك
هتكون هناك بسلااااااااااام
رغم الوجع وصوتى محبوس فى الحشا
هدعي ياولدي ربنا
تسكن هناك جمب الحبيب المصطفى
خير الورا فى أًمته
وإبقي قوله يابني أقبل أبويا و أمي
فـــــــــــ زمرتك
ـــــــــــــــــــــــــــــــــــــــ
بقلمي أحمد هلال