قصيده ( كحل القنديل ) للشاعر الكبير (( ناصر السمان ))

كحل القنديل

صبية جميلة أنا حبيتها وهي حاباني
من بين كل الصبايا أنا عشقتها وهي عاشقاني
وعشان سواد عنيها خبيت الكحل في النني
وعملت المكحلة عيني
وﻷجل خوفي عليها رميت كل المراود
وعملت مرود بشرياني
عشان ما تتكحليش من القنديل ياحلوة
و تشتكي من الوجع ياني
خايف من الفوضى و المعمعة تاني
ويتوه فيك (ي) وليدك و أحط خدي على إيدك و دخاني يكون ناري جوه تنهيدك
خايف من حبي لحسن يكون قيدي
و يصبح الوفا سجاني
ومن عيني يسيل مع الدموع كحلك
وانا مسجون في مكاني
خايف لييجي يوم يتقال على العميل بطل
و يصبح الشهيد جاني
ومن كل شيء خايف ماانا فاهمك
و انت يا سمرة فاهماني
و عشقي ليك على قلبي مكتوب
و مسطر في ديواني
عاشق ترابك و فاسك
عاشق ريحانك و فلك
عاشق هواك و وردك
عاشق لشمسك و ضلك
عاشق ميادينك و مدنك
عاشق جريدك و نخلك
عاشق لنيلك و ليلك
عاشق ربانك و أهلك
و ﻷجل ما انت حبيبتي
كلك يا قمرة عاجباني
ماهو أنا بسيط في هيئتي و عﻻمي
صعيدي جنوبي و أصلي جواني
و حلمي محدود و إسمي يبقى عنواني
بحلم أشوف ولدي بيتعلم صح حرف بحرف
بحلم أشوفه بيتنفس هواك من غير روتين وﻻ صف
بحلم تشوفي الدمع في عيوني
و من غير كﻻم تعرفي شكوتي و أحزاني
بحلم أقول اﻵه و تحسي برعشة الخدود والكف
بحلم أشوف ضلك بيضلل على الكل
ما انا عارف إن توبك يساع بدل اﻷلف
مليون ألف
بحلم ما حدش يركب الموجة
عشان ما اسمعش زعيق وﻻ نعيق في وداني
بحلم أمشي على أرضك من غير
مااشيل كفني على كتفي
بحلم أشوف الشمس في مرايتي
بحلم ما اشوفش البلطجة و العنف
بحلم أعزيك في الفساد
بدل ما هو إللي ف خيرك يعزيني
بحلم أشوف اﻷمية منهية و مش فيك
و اهنيك و احنيك و تتزفي على النور زف
و أصب على الفستان فرحة
و أعطر شالي من الطرحة
وفي الجاية و في الرايحة
هفرش لك روحي قدامك
ولو بردانة يا عمري
هلفك بالعباية لف
بحلم وأنا نايم وأنا صاحي
إني أشوف ياستي ضحكتك
على وشوش الوﻻد تاني

ناصر السمان
في حبها مصر