زفة شهيد
بقلمي .. أحمد هلال
ــــــــــــــــــــــ
مجتش ليه يا ولد
إيه أخَرك عن زفتك
الكل عاد بدري
طب ليه مأخر فرحتك
وأمك المسكينه صحيت لك
وم الفجريه طبخت بأديها لقمتك
سوت كمان .. فرشتك
رسمت ف وشك ضحكتك
وعروسه لك مستنياك
رسمه بإيديها حِنتك
إرجع ياولدي لحضن أبوك
بلاش تفارق دنيتك
أنا لسه واقف ع الطريق
مستنى أسمع خطوتك
تشق قلب الليل
تمحي الظلام من سِكتك
حتى صحابك ع الحدود
وياك ياولدي جم كتير
جايين يشاركو فرحتك
طب بس ليه الحزن باين ع الوشوش
والدمع سايل ع الرموش
طب هُما ليه جايين ياولدي لوحدهم ؟
فينك يا ولدى وسطهم ؟
حاسس برعشة جوا قلبي وخوف كتير
حاسس ب وقفة نبضتك
مين اللى قتلك يا ياولد
مين اللى ضيع فرحتك
صابك يهودي ياشهيد
ولا أخوك ودا مش اكيد
لوكان أخوك مكنش غير مِلته
باع كل حاجه ... حتى بايع أخرته
مين اللى خانك يا وطن
وهان عليه يوم دمعتك
طب قوم ياولدى وإبتسم
وأرسم على باب الفرح
نخل وطرح .. فى جنتك
تِعرف ياخوي؟
لساتها أمك ع الطريق
ماسكه بإيدها بدلتك
تستنى تعلن فرحتك
طب كيف أخبرها انا
إن ملايكه من السما
جاتلك هنا
علشان تنور دفنتك
يا ولدي وسندي ف الدنيا
وعكازي على الآيام
فارقت وغبت فى ثانيه
وراحت مننا الاحلام
بدلت توب العُرس
ولبسته بلا أكمام
إرتاح يا ولدي فى جنتك
هتكون هناك بسلااااااااااام
رغم الوجع وصوتى محبوس فى الحشا
هدعي ياولدي ربنا
تسكن هناك جمب الحبيب المصطفى
خير الورا فى أًمتك
قاعد بنادي بأعلا صوتي
مجتش ليه ياااااا ولد
ايه أخرك عن زفتك
ـــــــــــــــــــــــــــــــــــــــ
بقلمي أحمد هلال
ليست هناك تعليقات:
إرسال تعليق