قصيده ( بحاول اوصفها ) للشاعر (( محمود بدر ))

بحاول أوصفها
ــــــــــــــــــ
غنوه بصوت عالي
نغمها شديد ـــ
بلابل فـي سما صافيه
وصوت تغريد ـــ
فرحة أتمنيتها بتقرب
وحلم جديد ـــ
حضن بيداوي جروحي
وقلبي سعيد ـــ
ايام جميله بتضحكلي
ما بقتش وحيد ـــ
إيد حنونه بتلمسني
وصوت تنهيد ـــ
عيون شقيه سحرتني
ودم خفيف ـــ
طفله جميله صغيره
ملمسها لطيف ـــ
زعلها ثواني ويختفي
ونوم تخاطيف ـــ
هاديه وزي النسمه
تقول دي ملاك ـــ
مهما عليها بتقسى
بشوق تلقاك ـــ
ع الحلوه والمُره بتصبر
وعايشه معاك ـــ
حضنها دافي حنين
وزي النسمه ـــ
وقت شدتها تقابلك
بأجمل بسمه ـــ
نيتها صافيه لربنا
بريئه وواضحه ـــ
وقت غضبها وزعلها
بتبقى هاديه ـــ
عسووله وهيا فرفوشه
وفايقه ورايقه ـــ
لو أطلب منها عيونها
متقولش لأه ـــ
ذكيه وكل طلباتها
بدلع ورقه ـــ
بتغير عليا من الهوا
وبتبقى شرسه ـــ
بسهوله جداً اصالحها
لو جبت ورده ـــ
عشان اوصف ملامحها
كلامي يطول ـــ
لو زعلتني تراضيني
بكلام معسول ـــ
سيطرة على كل مشاعري
بشكل غير معقول ـــ
ولسه كلامي عنها كتير
وياما هقول ــــ
كل الصفات الحلوه
لقيتها فيها ـــ
عاوز اخبيها فـ قلبي
مـ الناس اداريها ـــ
سحرتني وملكتني كُلي
بعمري افديها ـــ
كل كلام الحب والغزل
شويه عليها ـــ
صفاتها من وسط البشر
صعب تلاقيها ـــ
بحب صوتها وضحتها
وكل ما فيها ـــ
صورتها دايماً فـ خيالي
والنوم كمان بيحلالي
لما بحلم بيها ـــ
•
•
( بقلمي •• محمود بدر )