قصيدة ( التدخين ضار جدا بالصحة ) للشاعر (( يوسف محمد الحمله ))

التدخين ضار جدا بالصحة

للشاعر يوسف الحمله
،،،،،،،،،،،،،،،،،،،،،،،،،،،،،،،،،،،،

هو ٠٠٠٠
قومي يا حبيبتي
طالبة معايا إتنين بالليل
قبل ما انام أخد نفسين
بالي معَلق ... صوتي مغَلق
قومي أوام كَرسي حجرين
هي ٠٠٠٠
حجرين ايه إتغطا وسافر
دانت مع الأمراض بتتاجر
وفلوسك إحنا أولى بيها
وصحتك هتضيع في الأخر
هو ٠٠٠٠
صحة ايه دانا لسه شباب
وفلوس ايه دانا عندي حساب
إنتي ايه غاويه تربيني
أنا مش طفل في الكُتاب
هي ٠٠٠٠
يا حبيبي إنت إنسان جميل
وفي الأدب ملكش مثيل
بس انا خايفة لاتضيع مني
وأنا وولادك ندوووق الويل
هو ٠٠٠٠
أصل أنا بَكره أخد أمر
وأنا مش ميت ناقص عمر
دووول ماكنوش نفسين علشانهم
هفضل صاحي لحد الفجر
هي ٠٠٠٠
أنا يا حبيبي خلاص فاض بيا
كده مش نافعة معاك حنيه
أنا وياك غُلبت محايله
أنا سايبه البيت م الفجرية
هو ٠٠٠٠
لا يا حبيبتي كله إلا ده
دانا مقدرش أشربها ساده
دانا خلاص توبت ونويت
أملا البيت أفراح بزياده
أملا البيت أفراح بزياده
،،،،،،،،،،،،،،،،،،،،،،،،،
التدخين ضار جدا بالصحة
بقلم الشاعر يوسف الحمله
5/12/2015 


14/8/2016