------ &&& رسمني &&& ------
رسمني صورة تشبه ايه
في سرك عني بتقول ايه
★
يا بختك طير طاير فوق
ثائر و لك الف كلمة حق
★
و للدنيا مش شايل هم
عاشق بتحب كل يوم
★
بتتفرج علينا من فوق
حالنا معاك مش فارق
★
بتضحك ضحكة من القلب
لا تعرف مر و لا طعم غلب
★
مقضيها من غير شيل هم
و رفاهية بتكتب عن الغم
★★★
راسم صورتي ولا شخابيط
خدعك وش من بعيد عنيد
★
عارف أنا شبهك بجد قوي
جبل عالي و جمل عفي
★
بس حاجات زيك بتوجعني
و كمان كلمة بتحرق دمي
★
بفكر في بكرة حلو لولادي
و ضلة حيطة ساترة بلادي
★
ثائر بس كتير بخاف صوتي
يسمعه جلاد جاير ما يرحمني
★
نفسي اصرخ زيك وسط ميدان
و اقول يسقط الظالم و السجان
★
عايز ارتوي من طول عطشي
و نهر النيل بيجري في ارضي
★
ببص للسما مكسوف من ربي
ما انا شبهك بتاخدني دنيتي
★
بحس بخنقة و قبضة قلبي
و مرعوب يوم اقابله بذنبي
★
بدعي يارب افرجها علي
عشمان فيك و انت سندي
★
راسم صورتي تشبه ايه
فارس فاتح قلوب خضرا
★
كل ليلة من نظرة لهمسة
عاشق ولا الحواديت كلها
★
يمكن برسم كلام على السطر
فارس من ورق يمحيه المطر
★
جايز عاشق عيونها السود
جايز عاشق بمليون لون
★
بشبه لك لما اشوف الورد
بيعجبني كام عطر و عطر
★
انا زيك في تفسير حلم
انا الموجوع من الصبح
★
حاجات كتير منك تشبهني
حتى الحمل الي على ضهري
★
لون عيني غير لون عينيك يمكن
لكن اكيد ملح دمعنا طعمه واحد
★
و دلوقتي ؛؛؛ رسمت لي صورة
تشبه ايه ؛؛؛ تشبه لك قوي ؛؛؛
ولا ايه !!!
؛؛؛ أمير
ليست هناك تعليقات:
إرسال تعليق