أهين يا أحمد
ياروح القلب من جوه
ياواخد عقلي ف الملكوت
مخلي الروح كما النوه
وآآآآه ياأحمد
ماعدش فيا من قوه
وحشني ياضله وناسه
وخدي منتظر بوسه
ومن أديك ولو دوسه
وخايف ييجي يوم عيدك
ماكون جنبك
وبحلم بيك بتندهلي
ياجدو قوم وروح هاتلي
أقول شاور ياروح جدو
ولو حتى 200 لعبه
دي كل الدنيا بتحبك
تقول هاتلي كمان عجله
ومسدس يكون له صوت
وعربه النقل تجري تفوت
وأكون فرحان
منا عمري لقيته معاك
وبجري وراك
وقلبي يدق من جوه
بيعزف لك كمان غنوه
عشان أنت نسيم ف ربيع
وعود أخضر وطفل وديع
وسبحان الذي سواك
جميل تقاطيع
وف عيني تكونلي ملاك
أهين يا أحمد
وفين أنت ياروح الروح
ياشاغل فكري فين ماروح
وماما عامله أيه وياك
أه يا أحمد
خايف من طلوع الروح
وعيني تبات ماهيش شيفاك
د أنت دوايا تشفي جروح
وأنت الذكرى من بعدي
وفيك أنت يطول البوح
يا أجمل طفل ف الدنيا
ومنه المسك دا بيفوح
وليك أنت يانور عيني
بيصبح كل شىء مسموح
تعاكسني .. وأيه يعني
تشد ف شعري وأيه يعني
وتركب أنت فوق ضهري
اقولك ضهري كان ملووح
وطاب منك ياروح جدو
أهين يا أحمد
ياضليايه ف عز الصيف
ربيعي وكان ربيعي خريف
ورده نديه بتفتح وعودها ضعيف
يانوارة سنين عمري وكل البيت
ولما جيت
قلبت الضلمه صبحت نور
صحيح إني بلف ودور
وبسأل فين حبيبي فين
يرد الجرح جوايا
سؤالك عنه مش مسموح
وآآآآآه يا أحمد
ليست هناك تعليقات:
إرسال تعليق