قصيدة ( غربه (( للشاعر (( احمد هلال ))

غربة
بقلمي احمد هلال
ـــــــــــــــــــــــــــــــــــــــــــــــ
يا غربة الأيام
غريب مالوهش رجوع
ماشي فـ سكه ظلام
ما تقيدها الف شموع
مرسوم عليا الألم
متفصل على قدي
اصرخ باعلا الصوت
ولا حد سامعني
انا حظي اصله كدا
طول عمري واجعني
حتي الكلام ف الهوا
وامتي كان مسموع
يا غربة الليل الطويل
عايش انا وحدي
امتي الحبيب هيميل
ييجي هنا عندي
واكتب بسن القلم
فرحه ليوم سعدي
واكسر طريق الألم
واروح له لو ممنوع
يا غربة القلب العليل
مكسور كتير م الهم
افتح بيبان للخير
يقلب عليا بغم
ارسم خطاوي الحب
يقولو روح واتلم
مكتومه ليه الصرخه
ومليانه عينى دموع
غريب والغربة صعبه
وانا وسط ناسي
حافظ جميل الناس
والكل بقه ناسي
اصيل وطبعي كدا
مكتوب ف كراسي
لا عمري يوم انحني
عايش كدا ف خشوع
ــــــــــــــــــــــــــ