قصيدة ( حكاية حب ) للشاعر الرائع المبدع (( شعبان أحمد ))

حكاية حب

عايق ومعجباني ولا يوم سرح بي الخيال
صابني الهوي مره وكنت خالي البال
شغلتني بنت حارتنا مليانه شوق و دلال
الوجه طبق الحسن تشبه بدر الكمال
رمتني بسهم العشق جرحت فؤادي و مال
ميل علي شباكها رمشي اللي عمره ما طال
طول عمري واد محترم دوغري و مالي مثال
قلت حكايتنا هتبقي غنوه ويمكن كمان موال
البنت معدن نفيس وأدبها سبق الجمال
رحت لأبوها وقلت شاري وطالب الوصال
سلم وقال مرحبا وابتسم في وجهي و قال
شربات يا بنت يا حسنه جالك عريس كيال
راح يوزن جمالك دهب ويخطفك في الحال
وقال لي كمان نتفق ما يكونش بيننا مرسال
أنا راجل كلمتي واحده مليش في لعب العيال
قد الجواز يا معلم أجهزها ليك في الحال
قلت يا عم النسب أنا أصلا طالب الحلال
بنتك في نن عنيا هاصونها لا تنشغل بالمال
طلعت زغروته ترن ولا رنة الخلخال
أمها دي ست أصيله حدفت لي طرف الشال
قالت بعزم ما فيها حمل البنات أحمال
عقبال هند وصفيه ومعاهم شهد و دلال

شعبان أحمد ......مصر