قصيدة يا حفيد صلاح الدين بقلم الشاعره المبدعه ( إلهام شرف )

(يا حفيد صلاح الدين)

لما قالوا ابنك وإبني

راح يعيش سواح في بلده

قلت اناضل عالحدود
الحروف فيها المدود
واو ....وياء
واو ...ويعوي كل بند
ياء...ياريت ترجع لعقلك
ياللي بعت ف مرة بلدك
والتمن أصبح غريمك
ابن دينك
شفت مرة بعيني شخصه
كنت واقف فوق سطوح
بوح يا نوحي
كان ما بينهم اتفاق
بل وفاق
هات.......وخد
هات حصان السندباد
وبإيديه شاور عليه
دوره جاي
دمعة فرت من عنية
قمت شاورت بإيديه
اعتراض.........
يرفعوا إيدهم قصادي
قلت انادي وصوتي عالي
انتباه.......
كل اللي رايح كل اللي جاي
والمفاجأة الكل أعمى بل أصم
صوتي راح
عقلي تايه من ساعتها
ناس بيتفقوا علينا
بس برضو الحق لينا
ما فيش ضياع
قلت احافظ جوه نفسي
بل أصون العهد ودي
وابتديت مشوار طويل
عشت فيه مرة السنين
كنت وحدي
بس ضاع الكره مني
وابتدى زمن المحبة
حبة حبة بقيت شراع
شفت دمعة اللي باع
شفت نفسي
شجرة عالية ف وسط زرع
لونه أخضر
والهلال في حضنه نجمة
بيقولولي الله أكبر
شفت طير
لون جناحه زى لون المنصورين
واضح مبين
شفت علمي بيترفع
شفت جامع نوره لامع
صوت يأذن
ناس تصلي
شفت بره المظلومين
يرفعوا إيدهم ياربي
كانوا بيقولوا آمين
هو ده النصر المبين
جاي قريب
بس إنت هتتوعد
لما عهدك يتولد
يا حفيد صلاح الدين...يا حفيد صلاح الدين
#شعر_عامية_الهام شرف