(يا شعب طيب)
يا شعب طيب حنين
مفهشى م البلا يبلى
م اسكندريه لحلايب
لآخر الصعيد قبلى
يا مكفى يومك فى نومك
وراضى بالمقسوم
ايه سوى فيك الغلا ؟
مكتوبتلك ومكتوبلى
.......................
يا شعب حامده وشاكره
على كل اللى بيجيبه
ربك بيرزق عباده
ولا حد بيسيبه
عمركش نمت جعان
ولا حد مات م الجوع ؟
يبقى على ايه القلق
هو دا عيبه!!!!!
.......................
اصبر على الأيام
متقلش هعمل إيه ؟
دا الصبر موصوف لينا
علاج ونمشى عليه
سيب الأمور ماشيه
خليها ع الرزاق
هو بيديه الفرج
فيه ايه هنبكى عليه؟
.........................
يمكن دى ازمه تعدى
ويحلها سيدك
راضيين بحكم القدر
مش بايدى ولا بايدك
هو الفقيرحيلته ايه؟
غير الدعا لله!!!
دا الفقر يمكن دوا
هيفيدنى ويفيدك
...................
ليست هناك تعليقات:
إرسال تعليق