قصيدة إتحولي بقلم الشاعر السيد أبوطاحون

إتحولي
*********
إزاى شفايف الورد
بتدوق الدما
و ازاى عيونك يا قمر
بتبخ نار
*********
إتحولي
إتحولي
انا مش هقولك ..
إعدلي او عدلي او بدلي
ولا هقولك أصبري
أنا نفسي بس تفكري
وتعرفي سر الوصول
وتقدري
وتقرري
يا تقتلي يا تغفري
*********
سامحتي كل
الفاسدين
والمصاصين
وأهل الخيانه المجرمين

جايه النهارده تفتري
وتمصي دمي
بترضي مين ؟ !
*********
إتحولي
إتحولي
لبستي توب الاحتشام
و وقفتي في صف الجمال
خلف الامام
صليتي ليه الفجر
ونويتي إيه ؟!
لما انت ناويه تفتري
و تغدري
و تقتلي
و تبيعي فيه
و تشتري
*********
إتحولي
إتحولي
تتحولي ديبه ..
او تتنمري
ضميني قبل ما تنحري
و تلغي في الدم الثري
و تنهشي اللحم الطري
*********
إزاي شفايف الورد
بتدوق الدما
و إزاي عيونك يا قمر
بتبخ نار
********* #إتحولي #الاخنوم #السيدابوطاحون